有日一個媽媽同個成年仔仔嚟睇醫生～
媽:登記呀
仔:哦，登記呀
我:嗯，睇過未㗎？
媽:好似睇過
仔:哦，睇過
我:俾登記時嘅電話號碼我check吓呀～
媽望住仔:你登記邊個number呀？
仔望住媽:唔記得啦！
媽望住我:唔記得喎，當新症得唔得呀？
我:一係俾身份證號碼我check呀？
媽望住仔:身份證呀！
仔望住媽:冇帶
媽望住我:冇帶喎，重新登記過得唔得呀？
其實…我聽到你仔講嘅嘢，又唔駛句句重覆嘅～
我:我唔係要身份證啊～講個number俾我得㗎啦～
媽:乜number呀？電話？咪話咗唔記得囉！
仔:身份證number呀？
我:……係呀
仔望住媽:身份證number幾多呀？
媽望住仔:我嗰個呀？c………哎，點記得啫…我拎身份證睇吓先…
我望住佢兩個爭啲想噴火燒到佢哋變粟一燒:邊個睇就要邊個嘅身份證號碼…
媽望住仔:要你嗰個呀！問我嗰個做乜啫！
仔望住媽:我問你我身份證幾多號呀！
媽望住仔:點知啫！我自己嗰個都唔記得啦！
兩個望住我，我:一係你寫中英文名俾我，我再check啦…
仔用眼神凌空睥枝筆，再望吓阿媽:你寫呀！
媽又將仔嘅眼神用眼神閘住，望住阿仔:我供書教學咁多年，你字都唔識寫呀？
仔:唔識
媽:我邊識寫呀？
唔好寫啦！唔好寫啦！唔好寫啦！唔好寫啦！唔好寫啦！唔好寫啦！唔好寫啦！唔好寫啦！唔好寫啦！唔好寫啦！唔好寫啦！唔好寫啦！唔好寫啦！兩個拗飽佢啦！做粟一燒啦！
我:算啦，當冇睇過啦好冇？重新登記過啦好冇？
媽:一早咁咪好囉，嘥哂啲口水！
我都廢事啋你:嗯，表格上填中英文名，出生年月日，身份證號碼，地址同電話～
你去飲多幾L水啦！咁填法，多多口水要你嘥呀阿媽！
“喂！填嘢呀！”
“呀！嗌你填少少嘢阿芝阿左！”
“而家你睇醫生定我睇醫生呀！”
“你個名英文係乜呀？講慢啲啦！R點寫呀？多多聲氣！你寫啦！”
“今日幾多號呀？乜話？寫出生日期咩？唔係寫今日日期咩？唉，咁鬼煩㗎！”
…
…
…(已不能盡錄)
佢唔想睇醫生咪由鬼得佢囉！同我拖佢出去！兩個呀！唔好漏低個阿媽俾我呀大佬～～
Search